Aко не го напуштат овој град Турците ќе ги нападнат
Објавено во: Балкан 29 Март, 2018
Турците се заканија дека ќе преземат акција доколку екстремистите веднаш не се повлечат од сирискиот регион Манбиџ и областа источно од реката Еуфрат.
Ова го соопшти Советот за национална безбедност по состанок што се одржа во Анкара.
Турција, која минатата недела го освои реонот на сирискиот град Африн по двомесечна офанзива против Силите за заштита на народот на сириските Курди, повеќепати се закани дека своите операции ќе ги прошири кон исток до Манбиџ, каде се стационирани и американски трупи.
Ширењето на турската воена офанзива на многу поголема територија која е под контрола на Курдите на исток, што турскиот претседател Реџеп Таип Ердоган вети дека ќе го направи, би довело до ризик од конфронтација меѓу сојузниците од НАТО, кои се во спор околу американската политика во Сирија и други прашања, велат аналитичарите.
Но, аналитичарите сметаат дека мала е шансата турската војска да нападне додека таму се распоредени американските сили, односно дека во догледно време Вашингтон и Анкара ќе мора да постигнат некаков договор.