Актуелното раководство на ССМ со последен обид за конструктивност
Објавено во: Економија 12 Јуни, 2017
Актуелното раководство на ССМ кое е во голем спор со членството каде се чека спроведување на одлуката за избор на новиот претседател Дарко Димовски, прави последни обиди за конструктивност во социјалниот дијалот предложувајќи нов закон со кој привремено вработените ќе имаат исти права како и тие со постојан работен однос.
Ова е предвидено во предлог-законското решение за агенциите за привремени вработувања кое веќе помина на последната седница на Економско-социјалниот совет и треба да влезе во владина процедура..
Сепак, Дарко Димовски го оспори легитимитетот на Митрески и посочи дека треба да биде впишан во Централниот регистар како нов претседател на ССМ по одлуката на Врховниот суд.
- Откако ќе го преземеме раководењето на ССМ ќе започнат преговорите за нов колективен договор како и вистинско застапување на правата на синдикалците, наместо претседателот на ССМ да биде човек близок до власта кој само ќе ги поздравува нејзините политики, изјави Димовски за Фактор.
Претседателот на ССМ Живко Митрески денеска на прес-конференција рече дека со овие законски измени бенефит би имале 5.131 работник.
– Со овој предлог закон се овозможува целокупните одредби од Законот за работни односи да важат за сите работници, односно и за работниците кои ги отстапува агенцијата за привремено вработување. Тие ќе важат и во делот на платата, на минималната плата, безбедноста и здравјето при работа, заштитата на посебните категории на работници… Важно е и тоа дека со член 21 и член 24 се регулира правото на слобода на синдикално организирање и колективно преговарање, истакна Митрески.
Х.С.