Анѓушев ги повика Италијаните да ја градат Македонија

Добивај вести на Viber

Вицепремиерот за економски прашања Кочо Анѓушев денеска ги повика италијанските компании да ги градат капиталните инфраструктурни објекти и да помогнат да се остварат планираните македонски инвестиции.

Италијански компании се веќе вклучени во инфраструктурни проекти во Македонија, како што е изградбата на експресните патишта, а ќе можат да се пријават и на претстојните тендери за изградба на пругата кон Бугарија. 

– За втората фаза од пругата се обезбедени средства, тендерот во првата фаза за техничка  квалификација е веќе завршен. Се радувам што на списокот на пријавени има и италијански фирми и се надеваме дека во евалуацијата ќе покажат добар резултат. За третата делница од Крива паланка до Деве Баир, која е и најкомплицирана и најскапа и ќе чини половина милијарда евра, се разговара за нејзино финансирање кое ќе биде обезбедено до крај на годината и ќе се распише тендер, рече Анѓушев, потенцирајќи го значењето на учеството на фирми од високоразвиените држави  од аспект на постапките за транспарентноста.

Анѓушев најави дека ќе следат и тендери за експресните патишта, за автопатот Гостивар-Кичево, за  енергетското поврзување со Албанија и за гасоводното со Грција, проекти на приватни инвеститори во делот на обновливи извори на енергија, како и изградба на пречистителни станици и регионални депонии. Постои простор за  соработка и преку Законот за финансиска поддршка на инвестиците.