Антокорупциската комисија денеска на два пати го става „на тапет“ министерот Асаф Адеми

Новоформираната Комисија за спречување на корупцијата од денеска започнува со своето реално работење и на својата втора седница за претпладне закажа две точки кои се поврзани со министерот за култура Асаф Адеми.

Под точката број два закажано е отворање на постапки за утврдување на судир на интереси по службена должност, со што треба да се разгледаат последните афери со вработувањата на свои блиски роднини од страна на јавни функционери. Адеми веќе потврди дека неговата сестра е вработена во АД ЕЕМ, а исто така таму работно место доби и синот на пратеничката Мира Стојчевска. Во меѓувреме излегоа информации и дека работни позиции добиле и сватови на пратеникот и генерален секретар на СДСМ, Александар Кирацовски.

Во четвртата точка е предвидено отварање на предмет за злоупотреби на распределба на буџетски средства за финансирање на програма од областа на културата. Станува збор за распределбата на средства за проекти од Годишната програма изготвени од комисиите а кои наидоа на големо незадоволство кај некои културни работници и институции. Министерот Адеми изјави дека тој само го одобрил она што го одлучиле комисиите, но ресорот е сепак под негово раководство.

На дневен ред се уште две точки во кои што ќе се разгледуваат барања за мислења доставени од разни институции за тоа што е дозволено а што не да се работи во изборниот период, односно се додека не завршат претседателските избори по нивното распишување, како и усвојување на записникот од првата седница кога антикорупциската комисија се формираше.