БАРААТ ПОМОШ ОД ДРЖАВАТА ЗА ПЛАТИ - 21.524 фирми се јавиле за меркта 14.500 денари

Добивај вести на Viber

За мерката поддршка од 14.500 денари на работодавачите за исплата на платите за април и мај, во УЈП, заклучно со крајниот рок, 7 мај годинава, аплицирале 21.542 компании, со што се опфатени 43 отсто од компаниите. Барањата ќе се обработат и потврдат во рок од 3 дена и ќе се достават до Генералниот секретаријат на Владата, од каде ќе се врши исплатата на парите за април.

Од вкупниот број поднесени барања, за угостителска дејност се 2.377, туристички агенции и туроператори се 253, транспорт 2.177, објекти за сместување 258 и за останатите дејности 16.625 барања.

„Сите работодавачи со комплетно барање, по обработка на МПИН образецот, ќе бидат информирани за вкупниот износ на финансиската поддршка што ќе им биде исплатена“, рече денеска на прес директорката на УЈП, Сања Лукаревска.

За физичките лица кои вршат самостојна дејност, исто така можат да користат поддршка од 14.500 денари за април и мај. Оние кои немаат профил на платформата е-даноци, ова барање го поднесуваат преку системот на е-персонален данок. Досега од нив се поднесени 5.840 барања. Тие поднеле и 2.164 барања за финансиска поддршка за исплата на плата за своите вработени. 

Преку Уредбата за субвенционирање на придонесите, со која се овозможува за април, мај и јуни да се користат субвенции до 50 отсто од придонесите, за ова работодавачот поднесува барање и образец преку системот е-даноци, а комплетноста на барањето го потврдува УЈП во рок од 5 дена. 

За барања за ослободување од плаќање аконтации на данокот на личен доход се поднесени вкупно 816 барања, а од нив се прифатени 597.

За ослободување од аконтации од данок на добивка барање доставиле 1.019 даночни обврзници, а прифатени се барањата на 747 фирми. 

На новинарско прашање зошто од најпогодените сектори угостителство и туризам пристигнале мал број барања, директорката Лукаревска рече дека можеби некои од нив користат од другите мерки, а можно е некои од нив за оваа мерка да аплицираат и наредниот месец. „Сепак, станува збор за доброволна мерка и избор е на самите фирми дали ќе ги користат“, рече Лукаревска.

Н.Н.Ф.