БАРАЛ И ПРИМИЛ ПОТКУП ОД 600 ЕВРА - вработен во Платежната агенција уценувал фирма за земјоделски субвенции
Објавено во: Македонија 30 Април, 2020
Вработен во Платежната агенција земал поткуп, поради што заработи кривична пријава.
Вчера Отсекот за економски крминал при Одделението за внатрешни работи Радовиш до Основно јавно обвинителство Струмица поднел кривична пријава против 38 годишниот И.Г. од Струмица, вработен во Агенција за финансиска поддршка во земјоделството и руралниот развој, за сторено кривично дело „Примање поткуп“ по член 357 од кривичен закон.
Овој вработен во декември лани за една компанија од Бучим која користи земјоделски субвенции изготвил записник без да констатира неправилности, а потоа му рекол на газдата или да му даде 600 евра, или ќе направи нов записник со неправилности, по што тој ќе морал да ги врати земјоделските субвенции. И не амо тоа, туку дека и идната година ќе нема право да бара вакви субвенции од државата.
„Во декември 2019 година осомничениот извршил контрола над земјоделски површини сопственост на правен субјект од с.Бучим, општина Радовиш, за што изготвил записник без констатирани забелешки, а врз основа на тој записник на правниот субјект му биле исплатени субвенции согласно Програмата за финансиска подршка во земјоделството за 2019 година. Во април 2020 година пријавениот остварил контакти со управителот на правниот субјект и побарал од него да му исплати пари во износ од 600 евра, како награда за претходно изготвениот записник без констатирани неправилности, а ако не го стори тоа, тој ќе изготви нов записник со констатирани неправилности, поради што ќе мора да ги враќа исплатените средства и нема да има право да аплицира за доделување на субвенции следната година“, се вели во соопштението од МВР.
На 29 април, пак, годинава, околу 08.00 часот на локален пат од село Бучим кон Радовиш од страна на полицски службеници од Одделението за внатрешни работи Радовиш е запрено патничко возило марка „мерцедес“, со струмички регистарски ознаки, управувано од И.Г., при што во возилото се пронајдени обележани банкноти во вкупен износ од 36.000 денари, кои претходно осомничениот ги примил од управителот на правниот субјект од село Бучим.
„И.Г. е лишен од слобода и по поднесена кривична пријава е предаден на Јавен обвинител од Основно јавно обвинителство Струмица, од каде е изведен пред судија на претходна постапка во Основен суд Струмица“, информира Полицијата.