Бесими демантира: Не се враќам во политика

Добивај вести на Viber

Фатмир Бесими, поранешниот министер за економија, демантираше дека на инсистирање на ДУИ ќе ја замени Анита Ангеловска - Бежовска како гувернер на Народна банка за таа да може да ја превземе испразнетата министерска функција во Министерството за финансии.

Вели дека моментов е посветен на академската професија и на универзитетската работа и дека нема намера да прифати каква било државна должност. Обраќајќи се до весникот Коха, Бесими вели дека неговиот приоритет, како и општото добро, останува членството во НАТО и почетокот на преговорите со Европската унија, а не делењето на функции.

"Во моментов, мојата главна грижа во професионалниот живот е ангажирање во академската сфера, универзитетската работа и професионалната соработка со меѓународните институции и организации. Инаку, немам ангажман во било кој јавен или владин сектор и истото не го планирам. Што се однесува до вестите, можам само да кажам дека мислам дека во овој момент - приоритет на нашето општество е членство во НАТО и почеток на преговорите со Европската унија, кои треба да бидат проследени со релевантните реформи, зајакнување на кредибилитетот на институциите и зголемување на инвестициите, создавање работни места и подобрување на благосостојбата на граѓаните, а не шпекулирање за кадровските прашања ", вели Бесими.