Бугарите кои земале мито за да издадат пасоши на Македонци се ставени на црната листа на САД
Објавено во: Балкан 03 Јуни, 2021
На црната листа на САД се и функционери кои земале мито за издавање бугарски пасоши на Македонци.
Меѓу шесте Бугари кои денеска Стејт Департментот ги стави на црна листа се и двајцата поранешни функционери од Државната агенција за Бугарите во странство, Петар Харалампиев и Красимир Томов. Тие се обвинети дека организирале мрежа за земање мито за издавање бугарски пасоши на Македонци. Двајцата беа уапсени во 2018 година, како дел од акцијата против раководството на Државната агенција за Бугарите во странство, преку која се издаваат државјанствата. Обвинетите земале мито, просечно по 1.000 евра, при издавање уверенија за бугарско потекло. Тие се кадри на ВМРО-БНД на поранешниот вицепремиер Красимир Каракачанов.
„Го објавуваме јавното означување на поранешните бугарски функционери Александар Манолев, Петар Харалампиев, Красимир Томов, Делјан Славчев Пеевски, како и актуелниот бугарски функционер Димитров Желјазков, поради нивна вклученост во значителна корупција. Манолев, Харалампиев и Томов, како заменик-министер за економија, директор на Државната агенција за Бугари во странство и генерален секретар на Државната агенција за Бугари во странство беа вклучени во коруптивни дејствија со што го поткопаа владеењето на правото и довербата на бугарската јавност во владините демократски институции и ги користеа своето политичко влијание и моќта што им ја носи функцијата за да остварат лична корист“, стои во соопштението на портпаролот на Стејт Департментот Нед Прајс.