Бугарското МНР по забраната за формирање клубови со контроверзни имиња: Не е по Договорот за добрососедство

Добивај вести на Viber

Официјална Софија упати загриженост по изгласувањето на законските измени во македонското Собрание за фондации и здруженија. 

Министерството за надворешни работи на Бугарија реагира дека овие измени го попречуваат ефективното спроведување на Договорот за добрососедство.

Собранието неделава ги донесе измените на Законот за здруженија и фондации и Законот за политички партии, со кои се осудува промовирањето на фашизам и нацизам. И двата закони се донесоа по скратена постапка.

Измените на законот за здруженија предвидуваат во иднина да не може да се регистрираат организации со контроверзни имиња, по примерот на здруженијата Иван (Ванчо) Михајлов и Цар Борис Трети и истоимените клубови. Овие здруженија и клубови ќе имаат време да ги сменат имињата, а доколку тоа не го направат во рок од три месеци, ќе бидат избришани од Централен регистар.

„Постои сериозна загриженост дека тие (законските измени) имаат за цел дискриминаторско ограничување на правото на здружување на Бугарите во Северна Македонија, за што повод е еднострано толкување на историските факти. 

Легитимната потрага за спротивставување на сите форми на екстремизам и омраза не може да се инструментализира за намерно ограничување на правата на одредени задници. Ограничувањата од ваков карактер во минатото веќе им беа наметнати на Бугарите во Северна Македонија“, се вели во соопштението на бугарското МНР.

Таму се додава дека со слични аргументи, во 2001 година била забранета организацијата Радко кој е псевдонимот на Иван Михајлов и дека Европскиот суд за човекови права (ЕСЧП) веќе донесол одлука по ова прашање.

Бугарија смета дека во интерпретацијата на историските личности и настани ќе биде доминантно официјалното интерпретирање што го има Македонија.