Чувајте ги сметките, Владата пред избори ги активира субвенциите од 1.000 евра за инвертери
Објавено во: Економија 14 Јуни, 2020
Владата пред парламентарните избори планира да го активира проектот најавен уште од лани со кој со повеќе од 5 милиони евра ќе го субвенционира целиот износ до 60.000 денари за купување на нова клима инвертер за замена на печките на цврсто гориво во Скопје, Битола, Кичево и Тетово како градови кои подлежат на најголемо загадување.
Градот Скопје во текот на следната недела ќе го објави јавниот повик за субвенционирање на граѓаните за купување високоефикасни инвертер клима уреди за затоплување. Во Буџетот на Град Скопје за 2020 година за оваа намена се предвидени 322 милиони и 400 илјади денари, обезбедни од Владата на РСМ. Во моментов не е познато дали ќе следуваат пари и преку локалните самоуправи на Битола, Тетово и Кичево, но истото е за очекување, согласно најавениот проект..
Граѓаните за да добијат субвенции за инвертери ќе треба доброволно и без надомест да ги предадат постојните печки на дрва, јаглен, нафта или мазут, додека средствата што Градот Скопје ќе ги субвенционира се во нето износ не повеќе од 62.000 денари.
Со јавниот повик се опфаќаат сите високоефикасни инвертер клима уреди кои се купени од 1 јануари 2020 година и ќе трае заклучно со 30 ноември 2020 година или до исцрпување на предвидените финансиски средства од Буџетот на Град Скопје за оваа намена. Повикот ќе се реализира согласно со принципот „прв дојден прв услужен“. На Јавниот повик немаат право на учество жителите (домаќинствата) кои имаат станбен објект со приклучок на градско централно греење без оглед на тоа дали го користат.
Субвенциите според проектот се обезбедени од буџетот на АД ЕСМ, односно од делот од позитивната добивка која ја оствари лани јавното претпријатие.
Владата и претпријатието пред десетина месеци најавија дека ќе се субвенционира вградување на инвертор клима системи за загревање на домаќинствата како супституција на огревното дрво, но не повеќе од 60.000 денари.