Дали цените на нашите горива го следат падот на светските берзи - Бислимовски вели: поевтинуваме соодветно

Добивај вести на Viber

Откако цените на нафтата драматично паднаа пред два дена, достигнувајќи исторски најголемо намалување во последните 20 години, се постави прашањето дали намалувањето на цената на бензините што се случи во понеделникот, е соодветно на падот на цените на светските берзи. 

Како што е познато, на 9 март годинава цените на светските берзи се намалија за 31 отсто, како резултат на паниката од коронавирусот, со тоа што нафтата од типот брент дојде до 31,43 долари за барел, додека суровата нафта падна на 30,07 долари.

Од друга страна, пак, во понеделникот нашата Регулаторна комисија за енергетика ги намали цените на горивата за 3,42 проценти, односно по два денари за бензините и за по денар и половина за дизелот и екстра лесното масло за домаќинствата.

Дали намалувањето е соодветно, Фактор го праша првиот човек на Регулаторната комисија за енергетика, Марко Бислимовски. Тој вели дека регулаторите ги определуваат цените во секој понеделник, односно еднаш неделно, врз основа на случувањата на светските берзи во претходната недела. 

„Значи, во текот на минатата недела, се до четвртокот, цените на нафтата беа стабилни. Всушност, големото намалување се случи во петокот, и тоа секако е вклучено во нашата најнова одлука за одредување на цените. Или, конкретно, доколку не се случеше намалувањето во петокот, цените на горивата ќе се намалеа само по половина денар, но поради тоа намалување, цените беа намалени за два денари кај бензините, и за денар и половина кај дизелот и екстралесното масло за домаќинствата“, објаснува Бислимовски.

Според него, наредната одлука за цената на горивата РКЕ ќе ја носи во понеделник, на 16 март, и во неа ќе бидат земени предвид движењата на цените на светските берзи во текот на оваа недела, што значи дека тие ќе се ефектуираат во новите цени. 

„Какви ќе бидат новите цени во понеделник, ќе зависи од тоа како се движат цените на светските берзи оваа недела. Еве, од вчера цените повторно почнаа да растат, па треба да се види дали ќе се стабилизираат, или ќе продолжат да паѓаат, и се ќе зависи од тоа“, вели Бислимовски.

Првиот човек на РКЕ потенцира дека во последните две недели, со нивните две последни одлуки, цената на бензините е намалена за 5 денари, односно за 9,8 отсто, а цената на дизелот за 4 денари, односно за 8 проценти.

Од почетокот на оваа година, пак, донесени се 10 одлуки за цените на нафтените деривати, од кои осум се за намалување.

„Никој не знае како ќе се движат цените на нафтените деривати во наредниот период, да го знаев тоа, јас ќе бев најбогатиот човек“, вели Бислимовски.

Во овој момент цената на брент нафтата е 37,2 долари за барел, што е пораст за 7,68 отсто во споредба со пред еден месец. 

Н.Н.Ф.