Дали Европа и Ердоган се збогуваат?
Објавено во: Балкан 02 Мај, 2017
Турскиот претседател, Реџеп Таип Ердоган испрати порака до челниците на Европската унија и порача дека можно е Турција да им каже збогум.
Тој ѝ порача на Европската унија дека мора да бидат отворени нови поглавја во пристапниот процес со Турција, или во спротивно Анкара нема повеќе за што да разговара со блокот и ќе им каже - збогум.
Ердоган го изјави ова после изјавата на европскиот комесар Јоханес Хан кој за британската новинска агенција „Ројтерс“ изјави дека Турција под водство на претседателот Ердоган ѝ го завртила грбот на Унијата и кон пристапувањето на Унијата.
„Сите се свесни дека, барем засега, Турција се оддалечува од европската перспектива“- вели за Ројтерс еврокомесарот Хан, кој ги следи кандидатурите за членство во ЕУ.По неколку години застој при обидот на Турција да се приклучи кон најголемиот трговски блок во светот, владите на ЕУ рекоа дека процесот замрел поради репресиите на Ердоган врз дисидентите, „нацистичките“ дефиниции кон Германија и референдумот, кој му даде нови големи овластувања, објаснува Хан.
Процесот засега не е официјално замрзнат, но европратениците повикаа минатата недела за официјално прекинување на преговорите, откако некои од нив изјавија дека Турција веќе не ги исполнува демократските критериуми, за да се прифати како кандидат, а камоли како член на ЕУ.