Дали ќе се зголеми бројот на работници во градежништвото?

Добивај вести на Viber

Во следните три месеци се очекува да се зголеми бројот на работници во градежништвото. 

Според оценката на раководителите на деловните субјекти од областа на градежништвото, индикаторот на  доверба во првото тримесечје од 2017 година е зголемен за 0.1 процентен поен во однос на претходното тримесечје, а e зголемен за 1.3 процентни поени во однос на истото тримесечје од 2016 година.

Ова го објави денеска Државниот завод за статистика. 

Очекувањата за вкупните порачки (договори) за градежни работи се речиси на еднакво ниво како во претходното тримесечје, а очекувањата за бројот на вработени се дека ќе се зголеми во наредните три месеци.

Оценката за економската состојба во првото тримесечје од 2017 е поповолна во однос на претходното тримесечје, а поповолна и во однос на првото тримесечје од 2016 година. Оценката за сегашната состојба со порачки (договори) на нивните деловни субјекти, како и оценката за финансиската состојба, се поповолни во однос на претходното тримесечје.

Во наредниот период се очекува продажните цени да се зголемат, a бројната состојба и квалитетот на механизацијата и опремата во првото тримесечје од 2017 година се над нормалата.

Најголемо влијание на ограничувањето за подобрување на тековната градежна активност имаат следните  фактори: зголемени трошоци за материјали со 20.7%, нема побарувачка со 17.0%, конкуренција во сопствениот  сектор со 10.6% и неповолни временски услови со 10.1%.