Дедај: Морина е задоволен од третманот во Македонија

Добивај вести на Viber

Амбасадорот на Косово во Скопје, Ѓерг Дедај, оствари средба со поранешниот припадник на ОВК, по што се огласи на социјалната мрежа Фејсбук дека осомничениот за злосторства над цивили, за кого Србија преку Интерпол бара екстрадиција, се пофалил дека бил задоволен од начинот на кој е третиран од институциите.

Пишува дека Морина е во добра состојба, смирен и самоуверен и тврди дека се чувствува невин. Дедај им се заблагодари на институциите за правилното постапување и додаде дека правдата е на страната на Морина и очекува тој многу брзо да се врати кај семејството во Косово.

„Им се заблагодаруваме на институциите на Република Северна Македонија, Управата на притворот Шутка во Скопје, за нивниот фер и пријателски третман, што ни ја овозможи нашата посета на поранешниот војник на ОВК, Томор Морина, претходно приведен од македонските власти. Томор беше многу смирен, се чувствуваше целосно невин, достоинствен и оптимист, чекајќи ослободување, бидејќи правдата е на негова страна и очекуваме многу брзо, тој да се врати кај семејството и во Косово! “ напиша амбасадорот Дедај.

Покрај амбасадорот Дедај, Морина претходно го посетија двајца дипломати вработени во амбасадата на Косово. Вицепремиерот Бујар Османи и заменик министерот за внатрешни работи Агим Нухиу не можеа да добијат дозвола за посета на Морина.

Инаку, вчера Министерството за правда го испрати до Кривичниот суд барањето на Србија за екстрадиција на Морина. Покрај барањето, адвокатот на Морина, Насер Рауфи,откри дека тој поднел барање за ослободување во текот на денот.