Денеска ќе вреди да се гледа Собраниски канал: Пратенички прашања по 100 дена од новата Влада
Објавено во: Македонија 30 Декември, 2020
Денес како ретко кога внимание може да му се посвети на Собранискиот канал на националниот сервис, затоа што за прв пат до функционерите ќе се поставуваат пратеничките прашања во Законодавниот дом по изминувањето на 100-те дена од формирањето на новата Влада.
Според деловникот за работа на Собранието, седницата за пратенички прашања треба да се одржи на крајот на секој месец, а денеска почетокот е закажан од 11.00 часот.
Предност со прашања до премиерот, вицепремиерите и министрите ќе имаат пратениците од опозициските ВМРО-ДПМНЕ, Алијанса на Албанците, Алтернатива и Левица, додека секое трето прашање на седницата ќе може да биде упатено од пратениците на СДСМ и ДУИ.
Од ВМРО-ДПМНЕ веќе најавија дека најголем број од прашањата ќе бидат на темата на евроинтеграциите, економијата и управувањето со пандемијата. Се очекува голем број „незгодни“ прашања и од пратениците на Левица како и од албанските опозициски партии.
Атмосферата изминатите денови и онака беше тензична во Собранието со расправите за законите за попис на населението, како и за откупот на делот на Макпетрол во АД ГА-МА за 33 милиони евра.
По новогодишните и божикните празници, Собранието ќе започне со работа на 11 јануари со седници што не се завршени, а нова седница ќе биде закажана за 18 јануари.