Дерала: Ваков скандал со бонуси немало две децении - да ги вратат
Објавено во: Македонија 24 Ноември, 2019
Иницијатива за враќање на бонусите кои ги зеле поранешната специјална обвинителка Катица Јанева и другите обвинители, како и сите вработени во Специјалното јавно обвинителство најави дека ќе покрене невладината организација „Цивил“.
Според првиот човек на „Цивил“, Џабир Дерала, ваков скандал и доделување енормни суми како дополнителни додатоци, не се случил во изминатите две децении.
„Скандалозно е да имате такви бонуси, па не знам каква работа да вршите во општеството. Скандалозно е да имате бонуси кои произлегуваат од буџетот на една земја во која има луѓе кои гладуваат“, вели Дерала.
Институциите досега не реагирале на нивната иницијатива за укинување на привилегиите на функционерите, иако добиле поддршка од неколку пратеници од СДСМ и од претседателот Стево Пендаровски.
Според Дерала, некои владини мерки одат во таа насока, но тие се далеку од доволни.
„Укинување не подразбира намалување, заменување, укинување подразбира нула. Нула привилегии за функционерите“, нагласува Дерала.