Дескоска до Груевски: Вратата на мојот кабинет е отворена, го поканувам да дојде
Објавено во: Македонија 15 Декември, 2019
Министерката за правда Рената Дескоска на Фејсбук му одговори на екс премиерот Никола Груевски кој е во Унгарија каде доби политички азил, откако тој побара од неа да даде докази кои фирми тој ги презел со присила или без.
Таа му порача да дојде, затоа што вратата му е отворена.
„Груевски ме почестил со своја реакција на моја изјава на дебатна емисија на ТВ21. Како одговор на неговата реакција сакам да потсетам дека во текот на дебатата за прашањата за кои реагира не кажав ништо ново што не можеше во минатиов период да се прочита во печатените и електронските медиуми. Сепак, вратата на мојот кабинет е отворена за Груевски, за да поразговараме за прашањата на кои реагира. Го поканувам да дојде“, напиша Дескоска.
Груевски вчера реагираше на Фејсбук, и ја обвини Дескоска дека мора да знае што зборува, инаку народот нема да ја сфати сериозно.
Бараше од неа да изнесе докази и веднаш да ја конфискува фирмата ако на таков начин е преземена.
Во ноември 2018 година Груевски избега во Унгарија каде доби политички азил од тамошните власти откако требаше да одлежи 2-годишна затворска казна во Македонија за случајот „Тенк“ на СЈО, односно за набавка на скапиот Мерцедес.