Деспотовски: Пописот ќе помогне за повисоки плати во индустриските зони

Добивај вести на Viber

Јован Деспотовски, директорот на Технолошко-индустриските развојни зони, во своето видео обраќање порачува дека пописот ќе придонесе кон привлекувањето на поголем број на странски инвестиции со производи со повисока додадена вредност со што би биле поголеми и платите на ангажираните работници.

– Секој потенцијален инвеститор којшто доаѓа во земјава, меѓу првите прашања кои ги поставува е прашањето за структурата на работната сила. И токму затоа пописот апсолутно и директно влијае врз одлуката на инвеститорите да вложат во Северна Македонија, и секако тоа што е многу важно, влијае врз структурата односно на висината на платите што овие компании ги даваат на работниците кои ги ангажираат. Така што, тие податоци кои ги очекуваме од пописот поврзани со работата на ТИРЗ ќе помогнат многу и можам да изразам мое лично очекување, апел и желба да добиеме квалитетни податоци кои ќе ни помогнат да си ја завршиме нашата цел и нашата мисија, а тоа е многу повеќе странски инвеститори, односно многу повеќе и многу подобро платени работни места, вели Деспотовски.

Тој вели дека новиот концепт на дирекцијата е да се привлечат странски инвестиции со поголем квалитет кои ќе донесат повеќе пари во буџетот, но и подобро платени места. Само така младите би ја виделе својата перспектива, наместо да размислуваат за иселување.

– Дополнително, целта е до 2024 година вработените во компаниите кои се веќе активни во ТИРЗ да добиваат 30-50 проценти поголеми плати. За таа цел, ТИРЗ работи на развој на мерки и програми  со кои ќе се поттикне растот на платите преку зголемена продуктивност на трудот и вложување во унапредување на вештините на домашните работници, додава директорот на ТИРЗ.