Димитров и Коѕијас денес на средба со Нимиц

Добивај вести на Viber

Министерот за надворешни работи Никола Димитров денеска ќе се сретне со својот грчки Никос Коѕијас на средба во Виена. Шефовите на дипломатиите на двете држави на средбата ќе се сретнат и ќе разговараат со медијаторот на Обединетите нации за спорот со името, Метју Нимиц.

„Средбата е дел од напорите на ОН за посредување меѓу двете земји за наоѓање заедничко прифатливо решение за прашањето за името“, соопшти прес-службата на ОН.

Коѕијас, пред оваа нова рунда преговори, минатиот петок, престојуваше во Скопје каде што оствари средба со Димитров, со премиерот Зоран Заев, со претседателот на Собранието, Талат Џафери и со лидерите на ВМРО-ДПМНЕ и ДУИ, Христијан Мицкоски и Али Ахмети.

„Веруваме во чесни договори, од кои во иднина двете страни ќе имаат придобивки. Да нема некој што ќе изгуби, а некој што ќе добие. Да има еден компромис“, изјави Коѕијас по средбата  со Димитров 

Позицијата на Грција е сложено име со географска одреденица, за севкупна употреба и промена на македонскиот устав.

Македонската страна останува на ставот дека вакво слеано име не е најдостоинствено решение, особено не преведено,а прашањето да биде решено со меѓународен договор, а не промена на уставот.

„Сегашната референца Поранешна Југословенска Република Македонија го содржи името Република Македонија и тоа е преведено на шесте официјални јазици на ОН. Тешко е да му кажам на мојот народ дека слеано име со некаква одредница заедно со името Македонија во еден збор е добро решение“, изјави Димитров.

Димитров најави дека после преговорите во Виена ќе побара лидерска средба во државата, што може да значи дека на маса ќе има конкретна материја за разгледување поврзана со спорот за името.