ДИРЕКТОРОТ НА БИТОЛСКАТА БОЛНИЦА ИТНО НА СОСТАНОК ВО МИНИСТЕРСТВОТО ЗА ЗДРАВСТВО: Ќе разговараат за смртта на малата Јана
Објавено во: Македонија 24 Март, 2023
Во моментов во Клиничката
болница Битола инспектори од Државниот санитарен и здравствен инспекторат вршат
вонреден надзор откако македонската јавност вчера беше потресена од веста за
смртта на шестгодишната Јана. Телото на девојчето е предадено на обдукција, а
резултатите се очекуваат по околу две недели, додека пак инспекцијата ќе
утврдува како починала Јана.
Во меѓувреме, во изјава за Фактор, директорот на Клиничката болница Битола, д-р Александар Обедниковски потврди дека е дојден во Скопје и дека точно напладне ќе има состанок со министерот за здравство Фатмир Меџити.
-Денеска сум во Скопје. Средбата со министерот беше договорена од претходно, но сега со оглед на ситуацијата ќе разговараме за оваа тема која сите не погоди. Инспекција на ДСЗИ е во моментов во болницата, а ние на овој сопстанок ќе побараме увид да изврши и посебна Комисија за здравство, изјави д-р Обедниковски.
Истовремено додаде дека други детали не може да соопшти бидејќи се води истрага за случајот.
Во меѓувреме, кусо соопштение пристигна и од Основното јавно обвинителство Битола, кое како што се наведува, издава наредби и насоки за да се извршат сите неопходни проверки. Причината за смрт на девојчето се уште не е утврдена.
Малата Јана почина завчера на Одделението за педијатрија само четири часа откако била примена. Д-р Обедниковски вчера соопшти детали во каква состојба било примено во болницата.
Анита Буховски