Две земји се скараа за помфрит, можни се нови царини

Добивај вести на Viber

Две земји се скараа за замрзнат помфрит.

Станува збор за Белгија и Колумбија.  Белгија побара помош од Европската Унија откако Колумбија отвори антидампинг истрага за увозот на замрзнати компири од неколку европски земји. Истрагата е започната на 1 ноември и таа би можела да резултира со воведување нови царини за овој производ. Тој е многу значаен за белгиската економија.

Белгија е најголемиот извозник на замрзнат компир во светот со 2,2 милиони тони во 2017 година и новите колумбиски рестриктивни мерки би можеле да имаат значајни последици за белгиските производители.

Германија и Холандија стојат зад белгиското барање, затоа што и нивните компании се засегнати од колумбиските мерки.

Белгискиот министер за надворешни работи Дидие Рејндерс, побара досието да се стави на масата на денешниот Совет за надворешни работи на ЕУ посветен на трговијата. 

„Со ваквите мерки на трговска заштита сакаме да ги вратиме условите на конкурентност на пазарот и да ги корегираме дисторизиите на домашниот пазар“, изјави помошник-министерката за надворешна трговија на Коломбија, Лаура Валдивезо Хименез.

Европската комисија вчера посочи дека ќе ги поддржи европските производители.

ЕУ и Колумбија склучија трговски договор во 2013, чија цел е постепена либерализација на пазарите на двете страни. Но, Богота се жали дека оттогаш колумбискиот пазар е преплавен со европски замрзнат помфрит, што има сериозни последици врз домашните прозиводители на компири.

Со оглед на тоа дека европските компании имаат поголем капацитет на производство, цените на европскиот замрзнат компир се пониски и ја ставаат во опасност колумбиската национална агроиндустрија, соопшти Владата во Богота.

Еврокомесарката за трговија, Сесилиа Малмстром, потврди дека Европа се подготвува да интервенира во Светската трговска организација (СТО) поради конфликтот со увозот на европски замрзнат помфрит во Колумбија.

фото Кодекс.ме