Економијата стагнира, не и долговите: Колку должат македонските компании
Објавено во: Економија 24 Август, 2018
Домашните фирми се во долгови, но колку е навистина нивниот долг. Според последни податоци, минатата година вкупниот долг на македонските компании се зголемил за дури 4,2 отсто и изнесувал 67,2 отсто од вкупниот македонски БДП. Во 2016 година овој долг изнесувал 66,8 отсто од БДП. Во годините претходно бил уште понизок. Компаниите должат најмногу кон банките, а ако се анализира задолженоста по сектори најголем долг кон домашните банки имаат компаниите кои се во секторот трговија, транспорт и угостителство, се разбира поради нивната бројност. Но, задолжени се и индустриските компании и градежниците.
Економијата стагнира
Фирмите должат и кон домашни, но и кон странски банки, ако позајмуваат надвор, најчесто преку нивните матични фирми. Речиси незначително се финансираат преку издавање должнички финансиски инструменти на финасиските пазари.
Во последните неколку години вкупниот долг на корпоративниот сектор пораснал за 7,3 проценти. Или ако во 2013 година долгот на домашните компании бил 62,6 отсто од БДП, во 2017 година е 67, 2 проценти. Динамиката е постојано нагорна. Во 2014 година долгот на корпоративниот сектор изнесува 64,2 отсто од БДП, во 2015 е 65,9 отсто од БДП, додека во 2016 изнесува 66,8 отсто од брутодомашниот производ.
Во периодот на раст на долгот немаше значаен раст на БДП, особено во последните две години, во кои поради политичката криза, економската активност трпеше доста.
Кој колку должи?
Фактор ја анализираше и задолженоста по сектори, но само кон домашниот банкарски сектор. Во 2017 година фирмите на банките им должеле 2,47 милијарди евра. Во 2016 оваа сума била 2,39 милијарди евра. И во двете години најголеми должници се компаниите кои работат во секторот трговија, транспорт и угостителство. Лани тие на банкарите им должеле вкупно една милијарда евра. Следуваат компаниите од секторот индустрија чиј долг кон банките изнесува 807 милиони евра, додека градежните компании земале кредити поради кои на крајот на годината на банките им должеле вкупно 285 милиони евра.
А.Т.