Економската интеграција на Балканот се прецизира во Сараево
Објавено во: Балкан 11 Мај, 2017
Агендата за регионалната економска интеграција е тема на состанок на претставници на 6 земји од Западен Балкан (ЗБ), меѓу кои и Македонија, како една од последните подоготовки пред самитот на ЗБ планиран за во јули годинава во Трст, соопшти Регионалниот совет за соработка (РСС).
Средбата на која учествуваат претставници од повеќе министерства и претставници на премиерите на западнобалканските земји е организарана од РСС, од Европската комисија (ЕК) и од ЦЕФТА. Се разгледува консолидиран преглед на клучните регионални економски иницијативи кои се, пред се, насочени кон зголемување на економскиот раст и на конкурентноста на регионот.
„Успешното намалување на цената на роамингот, напредокот во олеснувањето на трговијата и транспортот, умрежувањето во приватниот сектор, работата на изградбата на регионалната туристичка понуда, се некои од броијните области што докажуваат дека заедничките регионални напори носат дополнителна вредност – изјави Горан Свилановиќ, генерален секретар на РСС.
Бернард Брунет од Дирекцијата за соседство и проширување на Европската комисија, изјави дека Брисел исклучително ги поддржува напорите на шесте земји од Западен Балкан за продлабочување на регионалната соработка. „ЕК се надева дека на претстајниот самит во Трст ќе се усвои амбициозен акциски план’, изјави Брунет.
На работилницата присуствуваат високи претставници од министерства задолжени за трговија, инвестиции, труд, образование и ИТ секторите, исто како и претставници од министерствата за надворешни работи, и од кабинетите на премиерите на Албанија, БиХ, Косово, Македонија Србија и Црна Гора.
Регионаниот совет за соработка е меѓувладинот тело на земјите членки на Процесот за соработка во Југоисточна Европа, каде што полноправна членка е и Република Македонија.