Емигрантите со тунели против оградата на Орбан

Добивај вести на Viber

Унгарската полиција во текот на викендот откри тунел под жичана ограда на унгарско-српската граница, а во одделни акции спречи илегално преминување на повеќе од 300 мигранти.

Тунелот долг 24 метри е откриен во соработка со армијата во близина на унгарскиот град Морахал, а се верува дека тој бил користен за нелегално влегување на мигрантите во Унгарија, за потоа да заминат во Западна Европа.

Ова е трет подземен премин под оградата откриен за една година во тој регион. Граничната полиција уапси 54 лица кои се обидоа да прескокнат или да пресечат жичана ограда на границата во време кога 258 мигранти беа пронајдени во граничната зона без документи.

Повеќето од нив се изјаснуваат како Сиријци, но има и граѓани на Ирак, Иран, Авганистан и Палестинци. Унгарија бележи големо зголемување на бројот на мигранти кои се обидуваат илегално да влезат во Европската унија од крајот на мај, а само минатата недела имаше скоро 900 обиди за илегално преминување.

Унгарските власти повторуваат дека нема да ја отстранат оградата на унгарско-српската граница, туку ќе ја зајакнат одбраната на Шенген зоната, со цел да ги спречат мигрантите илегално да влегуваат во територијата на ЕУ.

Покрај северот на Војводина, обидите за илегално преминување на границата се бележат и на југозападниот дел од покраината, во хрватско-српската погранична област.

Во средината на мај специјалната и воената полиција беа распоредени во близина на Шид за, како што е наведено, да го заштитат локалното население од мигранти.