ЕУ ДО МАКЕДОНИЈА: Подготвени сме да помогнеме преку нашиот Механизам за цивилна заштита, доколку тоа биде побарано

Добивај вести на Viber

Европската Унија(ЕУ) е подготвена да помогне на Македонија по трагедијата во Кочани. 

Ова за МИА го потврдија од Европската комисија(ЕК).  

„Подготвени сме да помогнеме преку нашиот Механизам за цивилна заштита, доколку тоа биде побарано“, велат од ЕК. 

Во врска со пожарот се огласи и еврокомесарката за еднаквост, подготвеност и кризен менаџмент Хаџа Лабиб која изрази жалење за жртвите и изрази солидарност.

„Трагедија во Кочани, Македонија, каде што катастрофален пожар во ноќен клуб резултираше со голем број жртви и повредени. Нашите мисли се со жртвите, нивните семејства и тимовите за итни случаи. ЕУ е подготвена да даде поддршка. Солидарни сме со Македонија“, наведе Лабиб во објава на Икс.

Претходно изрази на сочувство, солидарност и тага изразија и претседателот на Европскиот совет, Антонио Кошта, претседателките на Европската комисија и на Европскиот парламент, Урсула фон дер Лајен и Роберта Мецола, високата претставничка на ЕУ за надворешни работи и безбедносна политика Каја Калас и еврокомесарката за проширување Марта Кос.

Најмалку 59 луѓе загинаа, а 155 се повредени во пожар што се случи минатата ноќ во ноќен клуб во Кочани. Македонија не памети ваква трагедија. Соседните земји понудија помош, а 13 повредени се упатени на лекување во Турција, Србија, Бугарија, Грција.