ЕУ му го менува „Планот 18“ на Бујар Османи
Објавено во: Македонија 26 Јули, 2018
„Планот 18“ на Владата, што го изработи вицепремиерот за европски прашања Бујар Османи, ќе биде преработуван на барање на Европската унија.
По планот за неопхопдни реформи 3-6-9, Османи го изготви „Планот 18“ со кој требаше да и се „објави“ војна на корупцијата и неправдата и истиот го презентираше на евроамбасадорот Самуел Жбогар и претставници на Делегацијата на ЕУ во Македонија, како реформски план.
Како што за „Мета“ објасни портпаролот на Владата, Миле Бошњаковски, по одлуката на Советот на министри на ЕУ, Македонија да ги почне пристапните преговори со ЕУ во јуни 2019 година, како и по почнувањето на процесот на набљудување, сега најновиот реформски план се менува и ќе се преработи, односно изготви нов текст.
„Планот 18 во моментов е во фаза на трансформација во План за скрининг и за исполнување на заклучоците од Советот на ЕУ. Владата работи на креирање на сеопфатен план за реформи кој опфаќаат три клучни столба а тоа се областите кои се спомнаа во заклучоците на Советот на ЕУ во Луксембург (судство, јавна администрација и разузнавачки служби), потоа препораките од Извештајот на ЕК и скринингот со кој се подготвуваме за почеток на преговорите во јуни 2019“, објасни Бошњаковски.