Европската комисија не знае од кога да не „прекрсти“
Објавено во: Македонија 11 Февруари, 2019
Европската Комисија чека да завршат сите формални процедури помеѓу Скопје и Атина за да го употребува новото уставно име на Македонија, иако официјално не знае од кој датум тоа би требало да случи.
Нејаснотија предизвикува тоа што не е децидно кој треба да каже во самата Европска унија дека обраќањето кон Македонија треба да се започне со новото уставно име.
Од ЕК информираат дека нејасно до крај е дали промената на терминот ќе се случи веднаш или дали ќе се чека одлуката на Колеџот на комесари или пак на Советот за надворешни работи на ЕУ, предвиден на 18 февруари, каде во заклучоците би можело да биде усвоена официјално употребата на новото име од страна на министрите за надворешни работи на ЕУ. И во Советот и во Комисијата се работи на утврдување на процедурите, информираат од овие институции. Според дипломатски извори, ЕК очекува известување од Скопје до среда оваа недела, паралелно со известувањето до ОН, објави МИА.
Во меѓувреме Македонија треба да го извести ОН и сите меѓународни и регионални организации дека Преспанскиот договор стапи во сила и да побара од нив да го користат терминот „Северна Македонија“.