Eвропските градови со засилени мерки за безбедност

Добивај вести на Viber

За дочекот на Нова година ќе има засилени мерки за безбедност во Европа. 

На плоштадите на европските градови ќе се врши претрес на торби, а на некои места ќе биде забрането и точење на алкохол.

Ширум Европа ќе бидат воведени зајакнати безбедносни мерки во пресрет на прославата на Нова година. 

Париз ќе ангажира речиси 8.000 полицајци и војници на улиците за француската престолнина да биде безбедна, соопштија властите. Целта на зголемената присутност на безбедносните сили не е само да бидат спречени терористичките напади, туку и евентуално избивање на нереди.

Кај Елисејската палата ќе биде забрането точење на алкохол, ќе бидат поставени бетонски барикади со цел да спречат евентуално влегување на автомобили. 

Северниот германски град, Хамбург неодамна постави нови безбедносни камери кои што ќе ѝ овозможат на полицијата да реагира за најкратко можно време доколку на некоја локација во градот се случи инцидент.

Од лондонската полиција соопштија дека граѓаните за новогодишната ноќ можат да очекуваат засилени патроли, вооружени полицајци и бетонски препреки за возила во централното градско подрачје.

Портпаролот на полицијата,  Фил Ланворти порача дека мерките не се спроведуваат поради информациите на разузнавачките служби, туку тие се дел од плановите кои што се изготвуваат веќе неколку месеци.