ФАКТОР НА ДЕНОТ: Недела неработен ден станува реалност, а листата за помилување е повлечена
Објавено во: Македонија 20 Декември, 2021
НЕДЕЛА СТАНУВА НЕРАБОТЕН ДЕН
Од 1 јануари недела се дефинира како неработен ден. Собранието денеска ги усвои законските измени за работни односи, а кои ќе се применуваат од следната година.
Прецизирани се дејностите во кои неделниот одмор може да се замени и со друг работен ден и тие по проценките се неопходни за нормално функционирање на општеството. Измените предвидуваат за 50 проценти поголема дневница и слободен ден за тие што ќе работат во недела, а се дел од овие дејности.
За 100 отсто поголема дневница и слободен ден се предвидува за оние работници кои ќе работат во несуштинските дејности, што е регулирано со Законот за трговија, за кој пратениците треба денеска да расправаат.ПОВЛЕЧЕНА Е ЛИСТАТА ЗА ПОМИЛУВАЊЕ
Ја информираме пошироката јавност дека Иницијативите за помилување покренати од Управите на затворите се повлечени од страна на Министерството за правда, објави заменик министерот за правда Агин Нухиу. Тој претходно рече се оградува од списокот со помилувања на осуденици потпишан од министерот Бојан Маричиќ, а кој требаше да биде испратен кај претседателот Стево Пендаровски.
Во последната објава Нухиу објавил и фотографија со Маричиќ и напишал
За каузата на правдата ние секогаш ќе дејствуваме!НАДЛЕЖНИТЕ ДАДОА ОБЈАСНУВАЊЕ ЗА АД „СЛАВИЈА“
Фатон Асани, директорот ја ДАУОИ денеска на прес - конференција изјави дека ВМРО-ДПМНЕ изнело невистини за продажбата на акциите на АД„Славија“.
Вели дека вредноста на компанијата е далеку помала од таа која тие на споменаа, односно 20 милиони евра. Асани кажа дека имотот во меѓувреме е распродаван на парче и зад затворени врати. Тој се повика на соопштенија кои ВМРО-ДПМНЕ ги објавувало своевремено за „Славија“.
„Цената на акцијата денес вреди многу помалку. Би го повикал лидерот на ВМРО-ДПМНЕ да се пријави на продажба и да ги преземе и долговите“, рече Асани.ЦАРОВСКА НЕМА ДА БИДЕ ДЕЛ ОД ИДНАТА ВЛАДА
Министерката за образование и наука Мила Царовска донела одлука да не учествува во новата Влада чиј мандатар најверојатно ќе биде новоизбраниот претседател на СДСМ Димитар Ковачевски. Претходно како што објавивме и министерката за одбрана Радмила Шекеринска објави дека не очекува нова владина функција.
„Во изминатите пет години заедно со мојот тим навистина испорачавме политики во интерес на граѓаните. Јас продолжувам да се борам и да се застапувам за истите вредности и за истите политики и навистина верувам во капацитетот и силата на државата, како и во силата на жените и младите, рече Царовска.ДЕНЕС ИМА 127 ЗАРАЗЕНИ СО КОРОНАВИРУСОТ
Министерството за здравство информира, согласно податоците од Институтот за јавно здравје дека во последните 24 часа:
Направени се 1.766 тестирања, а регистрирани се 127 нови случаи на КОВИД-19:
Скопје – 90, Охрид – 9, Битола и Штип – по 6, Кавадарци – 4, Струмица – 3, Прилеп, Ресен и Виница – по 2, Куманово, Кичево и Струга – по 1.ЧИТАЈТЕ УШТЕ