ФИЈАСКО НА СВЕТСКАТА ТУРИСТИЧКА ЕКОНОМИЈА: Пад до 80 отсто
Објавено во: Економија 08 Мај, 2020
Бројот на меѓународни туристички пристигнувања оваа година се очекува да падне меѓу 60 до 80 отсто, објави Светската туристичка организација (СТО). Британски Гардијан пренесува дека ограничувањата на патувањата и затворањето на аеродромите како мерки за сузбивање на пандемијата на Ковид-19, го доведоа туризмот во најтешка криза од 1950 година, откако почнала да се води ваква евиденција.
Во соопштението на СТО со седиште во Мадрид се наведува дека меѓународните пристигнувања на туристите опаднале за 22 отсто во првите три месеци од 2020, а само во март дури за 57 проценти, при што најголем пад регистрирале Азија и Европа.
-Светот се соочува со невидена здравствена и економска криза. Турузмот е меѓу најтешко погодените, а илиони работни места се во ризик во еден од најинтензивните економски сектори., вели генералниот секретар на Светската туристичка организација, Зураб Пололикашвили.
Најтешки последици, откако избувна пандемијата од крајот на 2019 година во Кина, претрпеа авиокомпаниите, зошто сите летови практично ги запреа, но огромни штети имаат и хотелиерите, организаторите на крстарењата и туристичките оператори.
СТО оценува дека размерите на падот на меѓународниот туризам ќе зависи од времетраењето на ограничувањата на патувањата и затворањето на границите. Спред најдоброто сценарио, доколку рестрикциите на патувањата почнат да се ублажуваат во почетокот на јули, меѓународните туристички пристигнувања би можеле да паднат само за 58 отсто, но ако мерките се укинат дури во почетокот на декември, падот ќе биде поголем од 78 проценти.