ФОКУС НА ДЕНОТ: Гајсер ја прозва Могерини, засега за „Рекет“ став соопшти само Хан
Објавено во: Македонија 11 Август, 2019
Новинарот на Ла Верита, Ларис Гајсер, утрово објави видео колумна.
Гајсер се чуди што нема реакција од Федерика Могерини и Жан Клод Јункер кои „инсистираа силно за специјалната обвинителка“.
„Во 2015., токму ЕУ инсистираше за СЈО, што му нанесе многу штета на Македонскиот народ. Денес, тие од ЕУ задолжително би требало да одговорат, особено на оние внатре во македонска администрација, коишто во изминатите месеци го ризикуваа животот помагајќи ни во објавувањето на материјалот, убедени дека сѐ уште е возможно да се има вистинска демократија базирана на информирано јавно мислење и контрола на политичарите“, пишува тој.
Во колумната тој ги коментира случувањата во земјава по објевувањето на аудио и видео материјалот за аферата и реакциите на политичарите и инволвираните во неа.
Eврокомесарот за проширување и соседска политика Јоханес Хан, за случајот Рекет напиша коментар на Твитер.
„Борбата против корупцијата на високо ниво мора да се одвива непрекинато. Што се однесува до најновите откритија, важно е да се утврди правна одговорност за сите кривични дела, вклучително и оние што произлегуваат од и околу илегалните прислушувања. Никој не е над законот и не може да има неказнивост. Надлежните органи мора да ги испитаат сите кривични дела, без никакво мешање, а сторителите да бидат изведени пред лицето на правдата“, напиша Хан на Твитер.
Претседателот на Србија, Александар Вучиќ денеска на прес-конференција во Генералниот секретаријат на прашање за случајот „Рекет“ кој е актуелен во Македонија, изјави дека не сака да се меша во внатрешните прашања на друга држава, но најави изненадувања.
„Колку што јас знам од добро информирани италијански извори, ќе има уште изненадувања во тој случај и верувам дека сега Зоран Заев го разбира она што му го кажував за одредени лица и дека тие се далеку од Србија“, одговори Вучиќ.
Toj спомна дека претходно многу се зборувало дека јавниот обвинител ќе придонесе за правда.Службеници од македонската администрација кои биле загрижени ги предале видео и аудио снимките од случајот „Рекет“ на италијанскиот весник Ла Верита кои изминативе четири дена објавува стории и материјали за скандалот кој ја тресе државата.
Вакво признание дава самиот автор Ларис Гајсер во последна видеоколумна објавена во денешното издание на весникот. Додава дека располагаат со уште аудио и видео снимки, како и документи за случајот, но во моментов се прават консултации со правници за нивно објавување.