(ФОТО) ДРЖАВЕН УДАР: Мадуро порача дека Венецуела нема да се предаде
Објавено во: Свет 01 Мај, 2019
Венецуела никогаш нема да се предаде на империјалистичките сили, изјави утрово венецуелскиот претседател Николас Мадуро.
„Првата назнака за обид за државен удар ја откривме во вторник, околу 04.15 изутрина. Предводник беше фашистот Леополдо Лопез, но ние одговоривме со челични нерви, максимална будност и ефикасно дејствување“, рече Мадуро.
Лопез е политички ментор на смаопрогласениот привремен претседател на државата, Хуан Гуаидо. То по затворската казна беше во домашен притвор, а на денот на обидот за преврат, побегнал од домашниот притвор и стоеше покрај Гуаидо кога тој го повика народот на востание. Лопез, потоа побегна во чилеанската, а потоа во шпанската амбасада во Каракас.
„Бунтовниците имаа тешко вооружување, но нашата војска и национална гарда ги надвладеаја“, додаде Мадуро.
Тој истакна дека учесниците во бунтот се на сослушување и оти ова нема да може да мине неказнето. Ги обвини своите противници за обид за предизвикување оружени судири меѓу Венецуелците, со цел тоа да послужи како оправдание за странска воена интервенција.
Претседателот на Народното собрание на Венецуела, Хуан Гуаидо повторно ги повика своите симпатизери на протести, најавувајќи „најголем марш“ во историјата на земјата.
Мадуро е на власт од 2013 година, кога го наследи својот ментор Уго Чавез. Сепак, од него наследи несигурна економија, која зависеше од високите цени на нафтата и системот на авторитарен популизам. Овој поранешен возач на камиони ја предводи администрацијата чие владеење е одбележано со хиперинфлација, недостиг на храна и лекови, рестрикции на струја, масовни протести, напади со дронови, дезертерство, санкции.
фото EPA