(ФОТОГАЛЕРИЈА) БАНКИТЕ И ДЕНЕСКА ПОД „ОПСАДА“ - граѓаните на ладно трпеливо чекаа за државните 6.000 денари
Објавено во: Финансии 24 Декември, 2020
И денешниот ден донесе редици и метеж пред банките од големиот број граѓани кои таму чекаат со часови за државната помош од 6.000 денари, која ја доделува власта за надминување на последиците од ковид кризата кај ранливите категории граѓани.
Фактор објвува неколку фотографии од денешната состојба надвор пред банките, со оглед што во внатрешноста на банкарските филијали можат да влезат само ограничен број граѓани, поради мерките за заштита од вирусот ковид 19.
Еве како изгледаше состојбата во некои од банките.
Од фотографиите може да се забележи дека и пред самите банки, поради големиот наплив од граѓани, неопходната социјална дистанца од 1,5 метри за заштита од коронавирусот, дефинитивно не се почитува.
Секако дека оваа државна помош која ја добиваат граѓаните е добредојдена, ама создаде и своевиден хаос кај граѓаните. Дел од нив не ги ажурирале сметките па ним парите не можеа да им легнат, дел имале блокирани сметки па излезе дополнителен проблем. Сето тоа, како што веќе пишуваше Фактор, создаде метеж пред банките.
Она што е важно а што го потенцираат банките е дека граѓаните кои се приматели на парична помош од 6.000 денари треба да внесат свои нови податоци во банките преку кои се издава помошта. Ако тоа не го сториле претходно и не ја користат сметката редовно тоа мора да го сторат до утре, односно до 25 декември. Тие пак што биле блокирани секако ќе ги добијат парите, ама мора да дадат ажурирани податоци за да им се отворат наменски сметки. Од Владата се децидни, а така пишува и во Законот дека граѓаните со блокирани сметки секако ќе ја добијат помошта.
Од Владата смируваат и велат дека без оглед на ситуацијата, сите кои ги исполнуваат условите ќе ги добијат парите. Тие можат да се трошат без ограничување во денови и исто така без потреба да се за македонски производи.
Помошта ја добиваат 283.000 граѓани од ранливите категории. Владата веќе уплати 24,6 милиони евра и целта е да им се помогне на ранливата категорија граѓани за полесно пребродување на кризата, а средствата кои ќе ги потрошат ќе се вратат во стопанството.
фото: Вангел Тануровски