Германија со најголем буџетски суфицит во светот за 2016 година
Објавено во: Свет 30 Јануари, 2017
Германија ќе го забележи најголемиот буџетски суфицит во светот во 2016 година . Тој се очекува да достигне 297 милијарди долари, надминувајќи го оној на Кина и да стана најголемиот во светот, прогнозира економскиот институт Ifo со седиште во Минхен .
Вишокот на тековната сметка на германската економија ќе биде со 26 милијарди долари повеќе од онаа година порано, кога беше 271 милијарди долари. Сепак, тој е помал од претходно очекуваните 310 милијарди долари.
Неговата вредност за 2016 година ќе изнесува 8,6% од БДП на Германија, што повторно го нарушува прагот од 6%, препорачан од Европската комисија. ЕК и САД ја повикаа Федералната република да ја зголеми домашната потрошувачка и увозот, за да помогне за намалување на глобалните економски дисбаланси и да го забрза глобалниот раст, вклучувајќи ја и онаа во рамките на еврозоната.
Германија возврати дека веќе е зголемена домашната потрошувачка преку воведувањето на националната минимална плата во 2015 година и силно се прошириле пензиските права во текот на изминатата 2016 година. Покрај тоа Владата ги зголемила државните расходи за патишта и дигитална инфраструктура, како и оние за бегалци, стремејќи се да се задржи избалансиран буџет.
„Федералната влада ги споделува ставовите на Европската комисија дека актуелниот германски вишок на тековната сметка треба да се оцени како висок - но не претставува прекумерен дисбаланс“, изјави портпаролот на германската влада.
Вишокот на Германија на тековната сметка заедно со другите земји од еврозоната се намалува до околу 2% од БДП, од околу 4% во 2007 година.
„Ова покажува намалување на трговските дисбаланси во рамките на еврозоната“, вели портпаролот, додавајќи дека 44% од овој буџетски суфицит на Берлин се должи на бизнис односите со САД и Велика Британија.
Минхенскиот економски институт предвидува 245 милијарди долари буџетски суфицит за Кина за изминатата година, што се должи на слабиот извоз. САД, пак, се очекува да имаат најголем увоз на капитал, со дефицит од 478 милијарди долари.
Овој рекорден суфицит во тековната сметка на Германија најверојатно ќе се намали во 2017 година, бидејќи забавувањето на светската трговија го еродира растот на извозот, додека силната домашна потрошувачка го стимулира увозот, прогнозира германскиот заменик-канцелар Зигмар Габриел.