Ѓорчев: На 21 април ќе набројувам „Победивме во Прилеп, победивме во Крива Паланка, победивме....“
Објавено во: Македонија 23 Јануари, 2019
Влатко Ѓорчев на прес-конференција во Собранието изјави дека ќе победи уште во првиот круг на 21 април на претседателските избори доколку биде номиниран од ВМРО-ДПМНЕ како кандидат во трката од оваа опозициска партија. Истакна дека сам ќе ги набројува победите по општини како што традиционално тоа го прави кога ВМРО-ДПМНЕ победува на избори.
„Половина час на 21 април ќе набројуваме каде се не сме победиле со „Победивме во Прилеп, победивме во Крива Паланка, победивме во Струмица. На сите пет ибори кога сум бил носител на листа секогаш сум победувал. Нема град каде што немаме намера да победиме. СДСМ нека му ја мисли затоа што ги излажа граѓаните. Заеднички ќе ги поразиме уште во првиот круг“, рече Ѓорчев.
Додаде дека веднаш ќе ја стартува внатрепартиската кампања по поднесувањето на кандидатурата на објавениот оглас.
„Докажав дека имам разумна глава и срце за Македонија. Се надевам дека во наредните три месеци уште повеќе ќе се запознаеме и ќе дебатираме. До симпатизерите им порачувам дека знам што ги боли, но борбата за Македонија никогаш не запира“, рече актуелниот пратеник.