ГО СЛАВЕЛЕ ДОАЃАЊЕТО НА ПЕРСИСКАТА НОВА ГОДИНА: Уапсени се млади жени во Иран кои танцувале на јавно место
Објавено во: Свет 09 Март, 2024
Две млади жени се уапсени во Иран затоа што танцувале на улица. Се товарат дека ги прекршиле општествените норми. Исламскиот закон во Иран им забранува на мажите да танцуваат со жени или само жените да танцуваат во јавност, соопшти АФП.
Се појавило видео на кое тие танцуваат за да го прослават доаѓањето на персиската Нова година, објавија денеска локалните медиуми, цитирани од агенцијата Франс прес.
Двете млади жени беа маскирани во Хаџи Фируз, фолклорен лик облечен во црвено, чии танци и песни го најавуваат доаѓањето на Новруз, иранската Нова година, која оваа година почнува на 20 март.
Видеото од двете млади жени кои танцуваат во близина на плоштадот Тајриш, популарно место во северен Техеран, стана вирално на социјалните мрежи.
Во последниве месеци, многу видеа од жени кои танцуваат на јавни места, особено во метрото, станаа вирални во Иран по протестното движење што ја потресе државата кон крајот на 2022 година по смртта на 22-годишната иранска Курда Махса Амини. Моралната полиција неа ја уапси за непочитување на строгиот кодекс на облекување на жените во земјата. По смртта на девојката, имаше насилни протести во Иран.