Готемолер: Членството во НАТО ги забрзува реформите во Македонија
Објавено во: Свет 11 Јули, 2018
Заменик генералниот секретар на НАТО, Рос Готемолер, за Алсат М. ги наброја придобивките за Македонија од членството во Алијанста, а меѓу нив е забрзувањето на реформите во земјата со самото интегрирање.
„Генерално, придобивките се во тоа што ќе се забрзаат реформите, ќе се подобрат капацитетите во одбраната и во останатите важни институции за зачувување на безбедноста. Ние ова го гледаме како голема придобивка. Но во генерална смисла, со членството на вашата земја во НАТО ние гледаме продолжување на градењето безбедност и стабилност на Западниот Балкан. Во време на големи предизвици во регионот и во јужните делови, ние мислиме дека Вашата земја ќе игра важна улога за зачувувањето на безбедноста и на стабилноста, а членството во НАТО ќе помогне во ова насока. Кога сите земји членки ќе го ратификуваат протоколот за прием, ние ќе и посакаме добредојде на Вашата земја како Република Северна Македонија. Ние навистина го сакаме тоа и тоа е одлична можност за Вашата земја“, изјави Рос Готемолер, заменик генерален секретар на НАТО.
Таа додава дека, според процедурите, НАТО се уште треба да ја нарекува земјата како ПЈР Македонија, но функционерите веќе почнале да ја именуваат како „Северна Македонија“ поради договорот со Атина и поради перспективата која ја гледаат во иднина.