ГРЧКО МНР: Изјавите на Захарова се карактеристичен пример на непочитување на трета земја
Објавено во: Балкан 18 Јули, 2018
Од грчкото Министерството за надворешни работи, во одговорот на изјавите на портпаролката на руското МНР, Марија Захарова велат дека изјавите на портпаролката се карактеристичен пример на непочитување на трета земја, како и недостатокот на разбирање на современиот свет во кој државите, независно од големината, имаат автономија да водат независна, демократска и повеќе димензионална надворешната политика.
Како што јави дописничката на МИА од Атина, од грчкото МНР велат дека податоците врз база на кои Грција реагирала за четворицата руски државјани, од кои двајца дипломати беа протерани, а двајца добија забрана за влез во земјата, им биле навремено презентирани на руските власти, „иако самите руски власти многу добро ги знаат постапките на нивните луѓе“.
„Континуираното непочитување на Грција мора да запре. Никој нема право да интервенира во нејзините внатрешни случаи. Неоснованите тврдења, според кои, одлуката е донесена под притисок на трети, не се вредни за коментирање и покажуваат менталитет на луѓе кои не ги разбираат принципите и вредностите на грчката надворешна политика“- пишува во соопштението од грчкото МНР.
Официјална Атина вели дека, Грција од самиот почеток се стремела да ги разграничи активностите на дипломатите од официјалната руска надворешна политика.
Захарова денеска кажа дека протерувањето на нивни дипломати ќе има последици. Дипломатите беа обвинети дека работеле против Договорот од Преспа за името.
Беше кажано дека се обиделе да поткупат грчки официјални претставници.