Груевски: Што се однесува до името, ние би можеле да имаме конструктивна улога

Добивај вести на Viber

Што се однесува до името, ние би можеле да имаме конструктивна улога доколку Владата планира реални и суштински разговори, а не капитулација и прифаќање на сите позиции на другата страна, вели лидерот на ВМРО-ДПМНЕ, Никола Груевски во интервју за порталот „Република“.

Ако планираат сè да попуштат, тогаш не им требаме ние, ниту пак сакаме да сме дел од тоа, вели Груевски. 

„За жал, мене работите ми личат дека марионетската власт во Македонија е спремна да прифати сè што бара Грција. Буквално сè. Како договорот со Бугарија. Нема да има суштински разговори, туку разговори како да се регулираат односите со јавноста во двете земји, во смисла да се контролира и ограничи степенот на триумфализам во Грција, а да се најде начин во Македонија капитулацијата по ова прашање да се претстави како голем успех, со одбран вокабулар, потврда за истото да дојде од надворешните фактори и меѓународната заедница, дефокусирање на јавноста со други теми и со напад и малтретирање на опозицијата и на сите што мислат различно, зауздување на медиумите во Македонија во правец да го развеселат народот дека нешто многу добро се случило, најава дека ќе дојдат многу грантови и пари, и дека ќе влеземе во НАТО и ќе почнеме преговори со ЕУ“ - вели Груевски. 

Тој додава дека неговата Влада многу сакала да најде решение и да стигне до компромис, но, како што вели, „за жал тоа беа години кога или грчката влада не сакаше да постигне компромис туку апсолутна победа, или беа со години во финансиска криза за време на која прашањето на името воопшто не им беше на листата на приоритети“.