Инспекциски контроли низ Македонија за квалитетот на месото кое се продава
Објавено во: Македонија 23 Февруари, 2018
Неквалитетно месо кружи низ некои македонски месарници. Сето тоа е резултат на недоволно добро спроведените мерки за дезинфекција и дезинсекција, непоседувањето на комерцијален документ за пратка како и нехигиената во објектите.
Во инспекциските контроли што се одвивале од декември па досега, Агенцијата за храна и ветеринарство најде многу недоследности.
Како што соопштија од Агенцијата, со засилени инспекциски контроли биле опфатени 398 месарници во однос на условите за производство, чување и трговија со месо и производи и подготовки од месо.
– Со контролите утврдено е и дека некои од операторите немале План за вршење на микробиолошки анализи на производите и подготовките од месо, а утврдено е и дека еден оператор со храна вршел дејност во нерегистриран објект од Агенцијата за храна и ветеринарство, наведуваат од Агенцијата.
За констатираните недоследности кај операторите со храна кај кои се спроведени контролите, донесени се 25 решенија за отстранување на недостатоците, спроведени се девет едукации и изречени 11 парични казни во висина од три до пет илјади евра во денарска противвредност.
Како небезбедени поништени се 414 килограми производи од животинско потекло кои биле произведени во несоодветни услови, односно, во неодобрен објект од Агенцијата за храна и ветеринарство.
Агенцијата ќе продолжи и понатаму со инспекциски контроли.