Иранските нуклеарки ќе издржат и силен земјотрес?
Објавено во: Свет 11 Мај, 2013
Иако силен земјотрес со интензитет од 6,2 степени според Рихтер денеска го погоди североисточниот дел на Иран, властите смируваат дека нема опасност од проблеми со нуклеарните централи.
Иранските нуклеарни постројки и хидроелектрани се добро заштитени од кибер напади и дури и од најсилни земјотреси, изјави вчера во Женева главниот ирански претставник за заштита на човековата околина Мохамад-Џавад Мохамадизадех.
Единствениот ирански нуклеарен реактор во Бушер не е оштетен во минатомесечниот земјотрес, кога загинаа 37 лица, а 850 се повредени, соопштија ирански претставници и руската компанија која ја изгради нуклеарката.
„Голем дел од нашите електрани, вклучувајќи хидроелектрани и дури и нуклеарката, можат да издржат потрес од минимум осум степени, па до околу десет степени од Рихтеровата скала, рече Мохамадизадех и додаде дека за време на изградбата се почитуваат највисоките познати стандарди за безбедност и заштита на човековата средина.
Иранската постројка за збогатување ураниум во Натанз беше прва во јавноста позната цел за напад со компјутерски вирус на некој индустриски погон.
Вирусот Stuxnet, за кој се верува дека го развиле САД и Израел, откриен е во 2010 година, иако експертите во корпорацијата Симантек откриле една негова верзија две години порано.
Иран се наоѓа на подрачје подложно на потреси. Минатиот месец, во еден од нив, со интензитет од 7,8 степени, загина една жена, додека неколку десетици се повредени.