ИЗГОР ДАВАЧКА: Поскапува регистрацијата – ова се новите цени!

Добивај вести на Viber

Заедно со одлуката да поскапат патарините, вчера беше донесена и одлука за зголемување на надоместокот за користење на јавни патишта за моторни и пприклучни возила. Популарната патна такса, влегува во трошоците за регистрација на автомобилот, кои на овој начин се зголемија значително.

Така, сега моторните возила со зафатнина на моторот од 900 до 1.350 кубни сантиметри ќе плаќаат 1.520 денари, наместо 1.060 денари како претходно; тие до 1.800 кубици ќе плаќаат 2.180 денари наместо досегашните 1.530; а тие со зафатнина на мотор до 2.500 кубни сантиметри ќе ги чини 2.910 денари, наместо досегашните 2.040 денари.

Возачите при регистрацијата на моторните возила задолжително мора да достават и докази за подмирени давачки, во кои спаѓа и надоместокот за користење на јавните патишта.

Согласно Законот за јавни патишта, висината и начинот на плаќање на надоместок за употреба на јавните патишта за моторни и приклучни возила (патна такса), ја пропишува Владата на Република Македонија, во зависност од категоријата на возилото, носивоста и/или зафатнината и јачината на моторот. Имателите на моторни возила што подлежат на регистрација надоместокот за употреба на јавните патишта го плаќаат при регистрација на возилата.

Финасиските средства прибрани на овој начин треба да се користат за изградба, реконструкција, рехабилитација, одржување и заштита на јавните патишта и за работење на Јавното претпријатие надлежно за овие дејности.

Според последните податоци, Македонците плаќаат меѓу највисоките цени за регистрацијата на своите автомобили. Основните трошоци за регистрација на возило со зафатнина од 2.000 сантиметри кубни, пред последното поскапување кај нас чинеа 200 евра, на кои се додаваат уште 90 евра за зелен картон. Во Србија за регистрација се плаќа 180 евра, во Косово 170 евра, Босна и Херцеговина 175 евра, а во Бугарија само 110 евра. Поската регистрација плаќаат само Словенците - 310 евра и Хрватите 450 евра.

Но, разликата е уште поочигледна ако се земат просечните примања во сите овие земји. Тогаш Македонците стануваат апсолутни „лидери“ бидејќи трошат околу 85% од просечната плата за регистрација на автомобилот. Во останатите земји тој процент се движи меѓу 25% и 60% од просечна плата.