Јовановска Типко: Добри односи не подразбираат илузија, туку односи во кои отворените прашања се решаваат преку искрен дијалог

Добивај вести на Viber

Трајно определување на Македонија е развој на добрите односи со сите соседи, изјави македонската амбасадорка во Србија, Вера Јовановска Типко на приемот организиран во Белград по повод Денот на независноста на Република Македонија.

Јовановска Типко вели дека тие добри односи не подразбираат илузија за некоја идилична атмосфера, туку односи во кои отворените прашања се решаваат преку искрен дијалог, взаемно почитување и меѓусебна доверба. 

„Токму кон такви односи се стремиме со пријателска Србија, со која не поврзуваат многу елементи од минатото, сегашноста и иднината, а најмногу човечките релации и взаемните симпатии кои се трајна вредност и поттик за континуирано подобрување на односите“ - вели Јовановска Типко.

Таа нагласи дека „Македонија денеска го прославува својот 26-ти роденден под глобалното небо прекриено со темни политички облаци, во подрачје каде што и најмал политички потрес може да предизвика разорно цунами и за момент да го збрише она што со години и децении макотрпно го градиме“.

Јовановска Типко порача дека „Македонија одлично чекори кон зацртаната цел, целосно свесна дека патот кон евроатланските интеграции е поплочен со тешки одлуки, визионерски постапки и тешки предизвици, но тоа е пат кој нема алтернатива“.

На приемот присуствуваа српската премиерка Ана Брнабиќ, претседателката на Собранието, Маја Гојковиќ, министерот за труд Зоран Ѓорѓевиќ, претставници на дипломатскиот кор, како луѓе и од јавниот и културниот живот на Србија.