Како да се наполни финансиската „дупка“ за пензискиот фонд?

Добивај вести на Viber

Со предлог буџетот за 2018 година и натаму видливо е дека државата пренасочува огромни средства за социјални трансфери, поточно за покривање на „дупките“ во Пензискиот фонд со цел сите пензионери да добиваат редовни исплати. Според предлогот за исплата на пензиите од буџетот догодина ќе се издвојат 880 милиони евра што е за 34 милиони евра повеќе во однос на годинава. Финансиската дупка во државниот пензиски фонд станува се поголема и ќе мора да се најдат начини како да се пополни за што можеби ќе бидат неопходни и болни реформи. Меѓу нив се зголемување на старосната граница за пензионирање и зголемување на придонесите, што се и предлози на Светска банка која на повеќе наврати апелира за обезбедување на  одржливост на пензискиот систем. 

Според професорот Шукаров оваа година, но и следната ќе бидат најтешки за ПИОМ, а потоа притисокот постепено ќе се намалува. Пензионерите кои ќе добиваат пензија од првиот пензиски столб ќе ги има се помалку. За дваесет година пак идните пензионери ќе добиваат пари од две места. Од државниот ПИОМ но и од приватните пензиски фонда.

„Моите анализи покажуваат дека денешно учество од 13,8 проценти, да речеме, од буџетот ќе падне на 6,6 или тоа ќе претставува  од денешни 4,4 проценти учество во БДП ќе падне на 2,3 што е толерантен износ“, вели професорот Мирољуб Шукаров - за ТВ 24.

Од Министерството за труд велат дека се планира реформа на пензискиот систем. Формиран е посебен Совет од четворица министри, вицепремиерот за економски прашања и директорите на државниот и приватните пензиски фондови кои треба да најдат системско решение Најверојатно ќе се менуваат заменските стапки, односно процентите за определување на висината на пензиите и начинот на кој пензиските друштва ги инвестираат парите од приватните пензиски фонда.

„Членовите на Советот утврдија дека направените анализи се основа за предложување на законски измени на почетокот на 2018 година за адекватност на пензискиот систем и повисоки комбинирани пензии кои ќе се добиваат од првиот и вториот пензиски столб“, велат од Министерство за труд и социјална политика.

За разлика од државниот фонд, двата приватни пензиски фонда. КБ и НЛБ пензиски фонд се во одлична кондиција. Друштвата кои управуваат со нив, минатата година оствариле профит од 2.5 милиони евра.