Како добивката на „Фершпед“ порасна за 66 отсто?
Објавено во: Економија 20 Ноември, 2018
Најголемата македонска шпедиција има нето добивка од 1,44 милиони евра за првите девет месеци годинава и во споредба со лани овој резултат е подобар за 66 отсто. Бројките што се достапни покажуваат солиден и континуиран пораст на приходите од продажба кој обезбедува раст на оперативната добивка
Секоја акција на најголемата македонска шпедитерска компанија „Фершпед“ за првите двет месеци годинава носи профит од 80 евра, покажуваат официјалните податоци од неконсолидираниот биланс на успех на оваа компанија. „Фершпед“ годинава во споредба со лани бележи значајно подобрување на финансиските резултати од оперативното работење. Расте приходот од продажба и тој во целост е генериран од домашниот шпедитерски пазар. За првите девет месеци приходот од продажба на „Фершпед“ е 41,44 милиони евра и за 3,8 милиони евра поголем од истиот период лани. Домашната продажба бележи солиден раст. Таа изнесува 39,78 милиони евра и во однос на истиот период лани е поголема за 4,3 милиони евра.
Клучот на успехот на „Фершпед“ е во тоа што растот на расходите не е пропорционален односно е понизок од растот на приходите од продажба. Тие во истиот период пораснале за 3,33 милиони евра во однос на лани и достигнале 40,1 милиони евра. Вкупните приходи од продажба во истиот период се поголеми од растот на расходите за речиси 0,5 милиони евра. Тоа е речиси идентично со растот на оперативната добивка која е за 0,53 милиони евра поголема од реализираната во истиот период лани.
Нето добивката на „Фершпед“ до крај на септември е 1,44 милиони евра и во споредба со лани е повисока за 66 отсто. Многу е значајно за „Фершпед“ тоа што компанијата во континуитет ги намалува финансиските расходи. Тие се сведени на нешто над 153.000 евра за првите девет месеци, а во истиот период лани изнесувале 25.300 евра повеќе.
Во последните три месеци односно периодот јули – септември компанијата ги остварила следниве резултати: приходите од продажба изнесуваат 14,54 милиони евра и се над кварталниот просек за првите две тромесечја. Оперативните расходи се исто така над просекот за првите два квартали и изнесуваат 14,34 милиони евра. Оперативната добивка е 0,3 милиони евра, а нето добивката пораснала за 0,2 милиони евра.
Р. Ф.