Како лани валаше „Макстил“?
Објавено во: Економија 23 Февруари, 2018
Приходите од продажба се значајно зголемени, но тоа слабо ќе ги згрее срцата на акционерите. Добивката е само 1,56 милиони денари, а приходот од продажба е околу 95 милиони евра.
Македонската челичарница, која произведува челичарски слабови и дебеловалани лимови лани оствари приходи од продажба во износ од 5,77 милијарди денари односно околу 95 милиони евра. Овој резултат е значајно подобар од 2016 година приходите биле помали за 2,1 милијарди денари, покажуваат официјалните резултати што ги објави компанијата.
Во структурата на приходите доминира извозот и тој донел 4,58 милијарди денари што е за 59 отсто подобро остварување од 2016 година. Продажбите дома на крај на декември лани се на ниво од 1,14 милијарди денари и бележат раст за 44 отсто.
Како и да зголемениот обем на работа уште не може да ги зарадува акционерите. Добивката на „Макстил“ е 1,56 милиони денари односно околу 25.000 евра и е на ниво од 2016 година. Од компанијата објаснуваат дека иако има значајно подобрување сепак и понатаму, заради светските непогодни прилики во челичната индустрија, нивото на искористеност на капацитетите на „Макстил“ е далеку под инсталираниот капацитет и заради тоа уделот на фиксните трошоци е голем предизвик во нивното работење и покрај зголемената продукција. Ова е објаснувањето од компанијата: „Реализацијата во количински показатели е 222.949,3т. што споредено со 165.593,8т. во 2016 претставува зголемување од 34,6%, додека приходите од продажби како носечка ставка во структурата на вкупните приходи се цца 3,7милијарди денари и се само незначително поголеми од остварените во 2016. Објаснувањето е во структурата на испораките изначително поголемото учество на преработките и тоа првенствено на преработките од набавен слаб каде надоместокот е помал) споредено со сопствените продажби во земјата и во странство.“
Рак рака се финансиските расходи
Финансиските расходи на компанијата лани достигнале 109,85 милиони денари што значи дека тоа се трошоците за: во најголема мерка за камати и доколку има и за курсни разлики. Тие трошоци во споредба со 2016 година лани се поголеми за 41 отсто. Од билансот на состојба се гледа дека компанијата на крајот на минатата година должела на банки речиси 3,1 милијарди денари. Од тоа значајно големо е учеството на обврските за краткорочни кредити и е во износ од 2,77 милијарди денари. Обврските за долгорочни кредити се 315 милиони денари и се пониски за 13 отсто во споредба со 2016 година.
Компанијата има акумулирана загуба која надминува 50 милиони евра.
Р.Ф.