Кардиоваскуларните болести косат, секој трет починат во Македонија има под 60 години

Добивај вести на Viber

Кај околу 78% од лицата кои починале лани во Македонија причина се кардиоваскуларните или респираторни болести, ракот и дијабетесот. Дури 30 проценти од починатите се лица под 60 години. Според светскиот економски форум, овие 4 болести се едни од најголемите закани за економскиот развој. Кардиоваскуларните болести се причина за смртта на 59,2 отсто од сите случаи, а ракот со 18,3 отсто. Според проценките, раст од 10% на овие 4 групи на болести, го намалува БДП на земјата за 0,5 отсто. Затоа од Светската здравствена организација побараа вложување во превенција. Според  Снежана Чичивалиева од СЗО во Скопје, боледувањата и болестите кај младите се најголема загуба на економијата,  покажуваат испитувањата на Светската здравствена организација. За министерот за здравство пак, Никола Тодоров, потребни се редовните кардиолошки прегледи за спасувањето на младите животи. Тој денеска ги посети новите простории на СЗО во Скопје, а беше посочено дека ваквата посета е прв сегмент од новиот договор со СЗО, за воведувањето глобална мониторинг рамка на СЗО за незаразните заболувања. „Како Министерство сме фокусирани на незаразните болести особено на кардиоваскуларните и малигните заболувања и за нив имаме посебна програма. За кардиоваскуларните заболувања направивме првпат програма во Министерството и како резултат на тоа сме фокусирани најнапред на формирање кардиолошка мрежа особено за интервентна кардиологија. Во тие рамки отпочнавме со интервентна кардиологија во Битола, Штип, имаме план тоа да го направиме во Тетово и во Струмица“, рече Тодоров. Во светот годишно 63 проценти од починатите  починале од незаразни болести. Секоја година во светот од 4-те најраспространети незаразни заболувања умираат 36 милиони луѓе.