ЌЕ ОСТАНЕ НА ФУНКЦИЈАТА: Кутиров реизбрана за директор на Царинската управа, Богоев не ја замени
Објавено во: Македонија 21 Февруари, 2022
Досегашната в.д. директорка на Царинската управа, Славица Кутиров е реизбрана за директор на оваа државна институција.
Според Кутиров, која беше в.д. од август минатата година, реизборот е потврда за квалитетното менаџирање на Управата во изминатиот период. Владата распиша оглас на кој бараше директор на Царинската управа, кој траеше до 11 февруари годинава. Кутиров вели дека ќе продолжела во спроведување на сите законски надлежности и приоритетите за развој на институцијата.
„Во следниот период, целокупното работење го насочуваме кон реализацијата на повеќе проекти кои имаат цел да обезбедат поефикасна наплата на приходите и заштита на финансиските интереси и на општеството, олеснување на трговијата, пред се преку понатамошна дигитализација на царинските и акцизните постапки и интеграција во регионот, како и понатамошна модернизација на ИКТ инфраструктурата и граничните премини. Во оваа насока, потенцирам дека работиме во специфични услови од аспект на пандемијата, која налага умешност во исполнување на активностите на Царината и непречена прекугранична размена на продукти за снабдување на граѓаните со потребните намирници, но и суровини за производство и извоз на компаниите, вели Кутиров.
За оваа позиција се споменуваа и други имиња меѓу кои како најсериозен беше Стефан Богоев, поранешниот градоначалник на општина Карпош.