ЌЕ СЕ ПОДИГНЕ БЕЗБЕДНОСТА: Провокација пред српската амбасада во Сараево
Објавено во: Балкан 15 Февруари, 2018
Непознати лица на влезот во Амбасадата на Србија во Сараево залепиле плакат на кој има нацртана мртовечка глава под која пишува „Четници костобацани“. Амбасадорот на Србија во Босна и Херцеговина, Станимир Вукичевиќ, изјавил дека до инцидентот дошло вчера меѓу 17.30 и 18 часот по што е информирана полицијата која извршила увид и го зела плакатот за вештачење.
Вукичевиќ вели дека ова е многу провокативен плакат и дека денешните демонстрации на босанското движење пред зградата на Амбасадата се два поврзани настани. Тој рече дека нема повод за таква реакција.
„Ниту сме направиле нешто ниту сме презеле, ни Амбасадата ни државата Србија, за да се реагира така“- изјави Вукичевиќ.
Тој најави дека Амабасадата на Србија во Сараево ќе ги подигне мерките за безбедност затоа што по еден ваков инцидент, тоа е обврска.
Смета дека причина за оваа провокација би можело да биде денешната прослава на празникот (Сретење) и дека на тој начин се покажало расположение кај дел од босанската популација кои не сакаат добри српско-босански односи, кои сакаат инциденти и не сакаат нормализација на односите меѓу земјите во регионот.
Во Србија денеска се одбележува Денот на државноста – Сретење, а по повод празникот и српската амбасада во БиХ организирала прием.