Кој колкав раст на БДП предвидува: Дали е доволен за граѓаните
Објавено во: Економија 08 Март, 2020
Македонската економија испорача раст со стапка од 3,6 проценти во 2019 година, а Владата очекува годинава БДП да порасне со стапка од 3,8 проценти колку што предвиде и со буџетот што го скрои за годинава. Сличен раст предвидуваат сите релевантни домашни и странски институции - некои процент-два помалку некои толку повеќе. Но дали е тоа доволно за растот да го почувствуваат граѓаните?
Познавачите се согласуваат деке БДП треба да рсте неколку години по ред со стапки од над 6 проценти за да се огледа тој раст на животниот стандард. Дали евентуалното стабилизирање на политичките турбуленции и ЕУ приближувањето може да го гарантира тоа? Експертите одговараат позитивно, сепак ние премногу долго ги поставуваме тие прашања, а ситуацијата не се менува.
Според проекциите на Владата во 2020 година реалниот раст на БДП се очекува да изнесува 3,8 проценти, а во наредните две години да продолжи со посилен интензитет, односно да достигне 4,1 проценти во 2021 година и 4,3 отсто во 2022 година и да е придвижен од домашната побарувачка.
Вчера од Владата изјавија дека растот на бруто домашниот производ од 3,4 отсто за последниот квартал од претходната година и вкупниот раст за целата година од 3,6 проценти е доказ за успешните економски политики.
Народната банка предвидува раст за домашната економија од 3,8 проценти годинава. Двигатели на растот треба да бидат извозот, инвестициите и личната потрошувачка.
Според Меѓународниот монетарен фонд во 2020 економијата на Македонија ќе порасне за 3,4 проценти, а според ЕБОР, растот на БДП годинава ќе биде 3,2 отсто.
А.Т.